Redmi 紅米 喺 2020 年嘅 5 月 26 號，發佈咗 Redmi 10X 系列嘅 5G 手機，一向以性價比高見稱嘅 Redmi，呢款機又會唔會跑出呢？ 今日就同大家睇吓。

Redmi 10X 系列主打年青人市場，官方以輕旗艦去做賣點，不過價錢就相當親民， $1599 人民幣起跳嘅 5G 手機，絕對係市場入面其中一部最平嘅 5G 手機選擇

Redmi 10X 系列分為 Redmi 10X 同埋 Redmi 10X Pro，主要分別喺相機配置同埋 NFC 嘅支援。兩部機都用上咗聯發科為中階手機度身訂造嘅天璣 820 處理器，配合 6.57 吋 20 : 9 FHD+ 三星 AMOLED 水滴全面屏幕，保留咗 3.5mm 嘅耳機插，亦都係用 USB-C 去充電，記憶體就由 6GB 起跳，最大支援 256GB 嘅內存空間，而且全系列支援 5G，內地行貨除咗支援香港標準嘅 n78 同 n79 頻段之外，亦都支援 n1，n3 同埋 n41，啱啱好配合到 Smartone 嘅 5G n1 覆蓋。Redmi 10X系列亦都支援屏下指紋辨識技術，唯一可惜嘅，就係淨係支援 Wi-Fi 5，亦都即係 802.11ac 技術，未追貼最新嘅 Wi-Fi 6 技術。另外要留意，只有 Redmi 10X Pro 係支援 NFC 嘅技術。

Redmi 10X 配合天璣 820 處理器嘅另一個好處，就係支援雙卡同時 5G 在線，比目前大部份嘅旗艦機，5G + 4G技術先進，你可以設定到當用緊嘅 5G 訊號較弱嘅時候，自動切換到另一張 5G 卡，隨時保持高速嘅上網。針對 5G 嘅技術，Redmi 10X亦都進行咗唔同場景嘅優化，確保可以喺高速同埋出?嘅時候，都保持 5G 訊號穩定。

相機嘅硬件一啲都唔失禮。Redmi 10X 全系列都配備咗 4800 萬像素主攝，同埋 800 萬像素最大 119 度嘅超廣角鏡頭，Redmi 10X Pro 就同時配備咗 800 萬像素三倍光學變焦，同埋 500 萬像素嘅微距鏡頭，以呢個價錢嘅手機配備 3 倍光學變焦都算罕見，而且仲同時支援 30 倍嘅數碼變焦，同埋 OIS 光學防震技術；而 Redmi 10X 就配備咗 200 萬像素嘅景深鏡頭，相對較為普通。

前置鏡頭方面，Redmi 10X Pro 同埋 Redmi 10X 分別配置咗 2000 萬像素同埋 1600 萬像素嘅自拍鏡，日常生活絕對夠用有餘。

拍攝軟件方面，Redmi 10X 系列最特別嘅就係加入咗流光相機拍攝模式，只要開啟模式，就可以簡單咁影到長曝光嘅相片，睇吓呢啲相，就知道有幾吸引啦！

呢部機配備咗 4520mAh 嘅電力，相信可以足夠最少用一日，Redmi 10X Pro 同埋 Redmi 10X 分別支援 33W 同埋 22.5W 嘅快充技術，不過就唔支援無線充電。

價錢方面，Redmi 10X 5G 由 1599 人民幣起跳，而 Redmi 10X Pro 5G 就由 2299 人民幣起跳，有凝夜紫、朧月金、深海藍同埋星露白 4 款顏色選擇，2020 年 6 月 1 日起正式喺內地市場發售。

《Z世代達人》
麥卓華

#Redmi10X #香港5G #紅米10X